उरुळी कांचन, ता. १२ : कुंजीरवाडी (ता. हवेली) येथे संत तुकाराम महाराज पालखी सोहळ्याचे अतिशय भक्तिमय वातावरणात स्वागत करण्यात आले. ग्रामपंचायतीकडून वारकऱ्यांना विविध सुविधा पुरविण्यात आल्या.
कुंजीरवाडी ग्रामपंचायतीच्या वतीने महामार्गाची दुतर्फा सफाई करून मोफत पाणी व्यवस्था केली होती. ओला व सुका कचरा इतरत्र पडू नये, म्हणून कचरा कुंडी व्यवस्थापन केले होते. गावात येणाऱ्या वारकरी दिंडीची व्यवस्था शाळा, मंदिर व मंगल कार्यालय येथे केली होती. हरित वारीद्वारे कुंजीरवाडी गावात ग्रामपंचायत व पर्यावरण समितीच्या वतीने वारकऱ्यांच्या हस्ते वृक्षारोपण केले.
यावेळी सरपंच अंजू गायकवाड, उपसरपंच अजय कुंजीर, शिवसेना नेते स्वप्नील कुंजीर पाटील, ग्रामविकास अधिकारी सविता भुजबळ, ग्रामपंचायत सदस्या सुमन कुंजीर, साधना कुंजीर, माजी उपसरपंच संतोष कुंजीर, नाना कुंजीर, भाऊसाहेब कुंजीर, काळूराम कुंजीर, संदीप धुमाळ आदींनी पालखीचे स्वागत केले.
आरोग्य अधिकारी डॉ. मेहबूब लुकडे यांनी माहिती दिली की, पालखीनिमित्त शासनाच्या वतीने हिरकणी कक्ष उभारला होता. याचे नियोजन अंगणवाडी कर्मचारी यांनी केले; तर प्राथमिक आरोग्य केंद्राच्या वतीने आरोग्य पथके तयार केली. तसेच, उन्हामुळे उष्माघात होऊ नये म्हणून याची खबरदारी म्हणून विसावा कक्ष उभारले होते. तसेच वारकऱ्यांची तपासणी करून औषधोपचाराची व्यवस्था केली होती.