उरुळी कांचन, ता. १० : बंद घराचे कुलूप तोडून दीड लाख रुपयांचा मुद्देमाल अज्ञात चोरट्याने चोरून नेल्याची घटना उरुळी कांचन (ता. हवेली) येथील तुपे वस्ती परिसरात सोमवारी (ता. ६) मध्यरात्रीच्या सुमारास घडली. या प्रकरणी नीता गोवर्धन पवार (वय ३१, रा. तुपे वस्ती, ज्योतिबा मंदिराशेजारी, उरुळी कांचन, ता. हवेली) यांनी उरुळी कांचन पोलिस ठाण्यात फिर्याद दाखल केली. याप्रकरणी अज्ञात चोरट्यांविरुद्ध उरुळी कांचन पोलिस ठाण्यात गुन्हा दाखल करण्यात आला आहे.
उरुळी कांचन पोलिसांनी दिलेल्या माहितीनुसार, फिर्यादी नीता पवार या सोमवारी (ता. ६) कुटुंबीयांसमवेत बाहेर गेल्या होत्या. त्या कुटुंबीयांसोबत मंगळवारी (ता. ७) सकाळी ११ वाजता घरी आल्या. तेव्हा त्यांना दरवाजाचे कुलूप तुटलेले दिसले. त्यांनी घरात जाऊन पाहिले असता, त्यांना बेडरूममधील कपाटाचे लॉकही तुटलेले दिसले. कपाटात पाहणी केली असता, ठेवलेली रक्कम आणि सोन्या-चांदीचे दागिने चोरीस गेल्याचे त्यांच्या लक्षात आले. मध्यरात्रीच्या सुमारास अज्ञात चोरट्याने बंद घराचे कुलूप तोडून ५२ हजार रोख रक्कम आणि सोन्या-चांदीचे दागिने असा एक लाख १२ रुपयांचा ऐवज चोरून नेला. पुढील तपास उरुळी कांचन पोलिस करीत आहेत.