उरुळी कांचन, ता. १६ : दारू पिल्यानंतर दोन मित्रांमध्ये किरकोळ कारणांवरून झालेल्या वादात डोक्यात दगड व लोखंडी हुकाने बेदम मारहाण केल्याची धक्कादायक घटना लोणी काळभोर (ता. हवेली) येथील माळीमळा परिसरात मंगळवारी (ता. १४) सायंकाळी सहा वाजण्याच्या सुमारास घडली. याप्रकरणी गुलाब सतीश परदेशी (वय ३२) यांनी लोणी काळभोर पोलिस ठाण्यात फिर्यादी दिली आहे. अंकुश बाजीराव मगर (वय ५५, दोघेही रा. माळीमळा), असे गुन्हा दाखल करण्यात आल्याचे नाव आहे.
लोणी काळभोर पोलिसांनी दिलेल्या माहितीनुसार, गुलाब परदेशी हे मोलमजुरी करतात, तर अंकुश मगर हा लोणी काळभोर येथील सिमेंटच्या मालधक्क्यात हमाल म्हणून काम करतो. हे दोघे मित्र आहेत. दोघांनाही दारूचे व्यसन आहे. मंगळवारी (ता. १४) सायंकाळी सहा वाजण्याच्या सुमारास परदेशी यांना मगर याने दारू पिण्यासाठी बोलावले. दोघेही मद्यधुंद अवस्थेत असताना, ‘तुझ्या खिशामध्ये काय आहे?’ असे म्हणून परदेशी याने मगर याच्या अंगाशी झटापट केल्याने मगर याने परदेशी याला शिवीगाळ केली. मगर याने त्याच्या हातात असलेल्या सिमेंट पोती उचलण्याच्या हुकाने परदेशी यांना मारहाण केली. यात त्यांच्या हाताच्या कोपऱ्याच्या बाजूस आणि डोक्यात दगड मारुन जखमी केले. तसेच, ‘तुला दोन दिवसांत मारुन टाकतो’ अशी धमकी दिली.