उरुळी कांचन, ता. १ : भरदिवसा बंद दरवाज्याचे कुलूप तोडून चोरट्यांनी तीन लाख रुपये किमतीचे सोने चोरून नेल्याची घटना उरुळी कांचन येथे शुक्रवारी (ता. ३१) दुपारी सव्वादोनच्या सुमारास उघडकीस आली.
याबाबत नारायण श्रीधर कुंभार (वय ६१, रा. आश्रमरोड, उरुळी कांचन, ता. हवेली) यांनी फिर्याद दाखल केली. या प्रकरणी उरुळी कांचन पोलिस ठाण्यात अज्ञात चोरट्यांविरोधात गुन्हा दाखल केला.
उरुळी कांचन पोलिसांनी दिलेल्या माहितीनुसार, फिर्यादी आणि त्यांचे कुटुंबीय हे शुक्रवारी (ता. ३१) सकाळी अकरा वाजता कौटुंबिक कार्यक्रमासाठी घराला कुलूप लावून बाहेर पडले होते. दुपारी सव्वा दोनच्या सुमारास घरी आले असता त्यांना घराचे कुलूप तुटलेल्या अवस्थेत आढळून आले. फिर्यादी यांनी आत जाऊन पहिले असता बेडरुममधील लाकडी कपाटाचे लॉकर उचकटून त्यामध्ये ठेवलेल्या सोन्याच्या दागिन्याची चोरी झाल्याचे त्यांच्या लक्षात आले. ४० हजार रुपये किमतीची सोन्याची ठुशी, ६० हजार रुपये किमतीची मोहनमाळ, ४० हजार रुपये किमतीची अंगठी, ८० हजार रुपये किमतीच्या दोन अंगठ्या, ४० हजार रुपये किमतीचा लक्ष्मीहार, ४० हजार रुपये किमतीचे कानातले, असा एकूण तीन लाखाचा मुद्देमाल अज्ञात चोरट्यांनी लंपास केले.