उरुळी कांचन, ता. ३० : कृषी विभागाकडून देण्यात येणार ‘स्वर्गीय मुख्यमंत्री वसंतराव नाईक शेतीनिष्ठ शेतकरी पुरस्कार’ हा थेऊर (ता. हवेली) शेतकरी विजय एकनाथ कुंजीर यांना जाहीर झाला. मुंबईतील वरळी येथील एनसीई क्रीडांगणात पार पडलेल्या कार्यक्रमात राज्यपाल सी. पी. राधाकृष्ण यांच्या हस्ते कुंजीर यांना प्रदान करण्यात आला.
सन्मानचिन्ह, शाल, श्रीफळ आणि ४४ हजार रोख रक्कम असे या पुरस्काराचे स्वरूप आहे.

यावेळी उपमुख्यमंत्री अजित पवार, कृषिमंत्री धनंजय मुंडे, कृषी विभागाच्या प्रधान सचिव व्ही. राधा, संचालक कृषी नायकवडी तसेच कुंजीर यांचे कुटुंबीय, थेऊर ग्रामपंचायत सदस्य युवराज काकडे, वैभव बडदे, प्रतीक कंद, अप्पासाहेब उंद्रे, विकास नागे, पृथ्वीराज काकडे, हर्षद शिंदे, प्रशांत शिंदे, संभाजी नायकवडे, वैभव लवांडे आदी उपस्थित होते. फेब्रुवारी २०२४ रोजी शासनाकडून या पुरस्काराची घोषणा करण्यात आली होती.

विजय कुंजीर यांचे वडील एकनाथ कुंजीर हेही प्रगतशील शेतकरी आहेत. विजय कुंजीर यांनीही उच्च शिक्षण पूर्ण झाल्यानंतर पॉलिहाऊस मधील ऑर्चिड, अँथोरियम, फिनोलॉपसिस या हायटेक फुलशेतीकडे वळत फुलांची झाडांची आयात निर्यात करून, जिल्ह्यात चांगला नावलौकिक केला आहे.