उरुळी कांचन, ता. १२ : उरुळी कांचन पोलिस ठाण्यापासून काही अंतरावर असणारी मोबाइलची दोन दुकाने फोडून विविध कंपन्यांचे मोबाइल चोरून एक कोटीचा मुद्देमाल लंपास करून फरार झालेल्या आरोपींना उरुळी कांचन पोलिसांनी हरियाना राज्यातून अटक केली आहे. स्थानिक गुन्हे शाखा व उरुळी कांचन पोलिसांनी हरियाना राज्यात ही संयुक्त कारवाई केली आहे. ही घटना मागील महिन्यात १९ जूनला पहाटेच्या सुमारास घडली होती.
याप्रकरणी हमीद हुसेन अब्दुल करीम (वय ३९, रा. नूंह, मेवात, राज्य-हरियाना), हफिज शरीफ (वय ३५ , रा. घाटागाँव, फिरोजपूर, झिरका जि. नूंह, राज्य-हरियाना) इमामुद्दीन अन्वर खान (पूर्ण पत्ता नाही) या आरोपींना अटक करण्यात आली आहे. जियाउद्दीन इमामुद्दीन खान, फकरू, अरमान, पवन राठोड हे फरार आहेत.
उरुळी कांचन पोलिसांनी दिलेल्या माहितीनुसार, मागील महिन्यात १९ जूनला पहाटेच्या सुमारास उरुळी कांचन येथील द कॉर्नर मोबाइल शॉपी व माणिक मोबाईल शॉपीमध्ये दरोडा टाकून मोबाईल चोरी झाल्याची घटना घडली होती. यामध्ये अंदाजे एक कोटीचा मुद्देमाल चोरीस गेला होता. तांत्रिक विश्लेषनाच्या आधारे दोन्ही गुन्ह्याचा तपास करत असताना आरोपी हे हरियाना राज्यातील नूंह येथे असल्याचे निष्पन्न झाले.
दरम्यान, आरोपी हमीद हुसेन अब्दुल करीम, हफिज शरीफ, इमामुद्दीन अन्यर खान या आरोपींची पोलिस कोठडी संपली असून सध्या ते न्यायालयीन कोठडीमध्ये आहेत. पुढील अधिक तपास उरुळी कांचन पोलिस करीत आहोत.