उरुळी कांचन, ता. १२ : अनेक दिवसांपासून उरुळी कांचनसह परिसरात विद्युत रोहित्र चोरीच्या घटना घडत होत्या. मंगळवारी (ता. ११) रात्री ११ वाजण्याच्या सुमारास तीन चोर हे विद्युत रोहित्रातील तांब्याच्या तारा चोरी करण्याचा प्रयत्न करत होते. त्यावेळी ग्रामस्थांच्या सतर्कतेमुळे तीन पैकी एका चोराला पकडण्यात ग्रामस्थांना यश आले. त्यास ग्रामस्थांनी उरुळी कांचन पोलिसांच्या स्वाधीन केले आहे.
दिनेश सिन्हा (वय अंदाजे ४७) असे पोलिसांच्या ताब्यात असलेल्याचे नाव आहे. याबाबतची माहिती अशी की, वळती (ता. हवेली) येथील कुंजीर ॲग्रो फ्रुट्स या कंपनीने दहा दिवसांपूर्वी नवीन रोहित्र बसवले होते. तसेच चोरीच्या घटनांमुळे कंपनीच्या मालकाने रोहित्र परिसरात सीसीटीव्ही कॅमेरे बसवले होते. मंगळवारी रात्री कॅमेऱ्यामध्ये काही दिसत नसल्याने मालक व ग्रामस्थांनी कंपनीकडे धाव घेतली. त्यावेळी तिथे तीन चोर रोहित्र जमिनीवर पाडून ते फोडत त्यातून तांब्याच्या तारा बाहेर काढण्याचा तिघे जण प्रयत्न करीत असल्याचे ग्रामस्थांना दिसले. ग्रामस्थांनी आरडाओरडा करत धाव घेतल्याने चोरांनी तेथून दुचाकीवरून पळ काढला. ग्रामस्थांनी चोरांचा पाठलाग केला. पुढे एक ते दीड किलोमीटर अंतरावर शिंदवणे ग्रामपंचायत हद्दीतील संत यादवबाबा शाळेच्या समोर आल्यावर चोरांची दुचाकी घसरून पडली. त्यावेळी दोन चोर उठून दुचाकीवरून पसार झाले तर दिनेश तारेच्या कुंपणामध्ये गुंतून खाली पडला. त्यावेळी ग्रामस्थांनी त्याला पकडले व पोलिसांच्या ताब्यात दिले. दरम्यान, १५ दिवसांपूर्वी पांढरस्थळ येथील शेतकरी अमित कांचन यांचे विद्युत रोहित्र फोडून तांब्याच्या तारांची चोरी झाल्याची घटना घडली होती.