उरुळी कांचन, ता. २५ : उभ्या असलेल्या कंटेनरमधून १८ हजार रुपये किमतीचे तब्बल २०० लिटर डिझेल चोरट्याने चोरून नेल्याची घटना पुणे- सोलापूर महामार्गालगत उरुळी कांचन (ता. हवेली) येथे शनिवारी (ता. २३) पहाटे चार ते सकाळी सात वाजण्याच्या सुमारास घडली.
या प्रकरणी अमोल हनुमंतराव निगडे (वय ४२, व्यवसाय ड्रायव्हर, रा. मु. पो. गुळुंचे- कर्नलवाडी, ता. पुरंदर) यांनी उरुळी कांचन पोलिस ठाण्यात फिर्याद दिली आहे. याप्रकरणी पोलिस ठाण्यात गुन्हा दाखल करण्यात आला आहे. उरुळी कांचन पोलिसांनी दिलेल्या माहितीनुसार, कंटेनर चालक अमोल निगडे हे पुणे- सोलापूर महामार्गालगत उरुळी कांचन येथील शिवनेरी मिसळ परिसरात शनिवारी (ता. २३) पहाटे चार वाजता गाडी उभी केली होती. सकाळी सात वाजण्याच्या सुमारास त्यांना जाग आली असता त्यांना डिझेलची टाकी उघडलेल्या अवस्थेत आढळून आली. त्यावेळी त्यांनी जवळ जाऊन पाहणी केली असता त्यांना डिझेल चोरी झाल्याचे लक्षात आले.