वडगाव निंबाळकर, ता. २६ : लोणीभापकर मुढाळे (ता. बारामती) गावच्या हद्दीवर टेंगलेवस्तीजवळ लांडग्यांच्या हल्ल्यात सुमारे सतरा मेंढ्यांची पिले (कोकरू) ठार झाली. ही घटना मंगळवारी (ता. २५) दुपारी ११ वाजता घडली.
सोमा भिवा टेंगले यांच्या शेतात आबा हिरामण नानवर (रा. मुर्टी) या मेंढपाळाच्या मेंढ्या बसल्या होत्या. सकाळी मेंढ्या चरायला बाहेर गेल्यानंतर पिल्ले जाळीमध्ये ठेवली होती. आजूबाजूला उसाची शेती असल्यामुळे शेतातून आलेल्या लांडग्याने पिलांवर हल्ला केला. यामध्ये सुमारे सतरा पिलांचा मृत्यू झाला, असे नानवर यांनी सांगितले. दरम्यान, घटनेनंतर वनमजूर गोरख भापकर, सोमनाथ जाधव वनपरिमंडल अधिकारी अमोल पाचपुते यांनी घटनास्थळी जाऊन पंचनामा केला. दरम्यान, दहा पिलांचे अवशेष सापडले असून, पशुवैद्यकीय अधिकाऱ्यांनी शवविच्छेदन केले. लांडग्यांच्या हल्ल्यामुळे हा प्रकार घडल्याने वनविभागाकडून सांगण्यात आले.
मृत पिलांच्या पंचनाम्यानुसार योग्य ती भरपाई मिळण्याबाबत कागदपत्रांची पूर्तता करून वरिष्ठांकडे पाठवण्यात येतील, अशी माहिती तालुका वनाधिकारी शुभांगी लोणकर यांनी दिली.