वडगाव निंबाळकर, ता. २७ ः नगर व भूमापन कार्यालयाच्या लेखी आश्वासनानंतर बारामती तहसील कार्यालयासमोर उपोषणास बसलेल्या कोऱ्हाळे खुर्द (ता. बारामती) येथील मयूर बांदल, अविनाश गाढवे यांनी आपले उपोषण मागे घेतले आहे.
नगर भूमापन कार्यालयाने गावात केलेला सिटी सर्वे लागू करावा, सार्वजनिक जागेवरील अतिक्रमण त्वरित हटवावे, सार्वजनिक रस्ते खुले करावे, या मागणीसाठी बारामती तहसील कार्यालयासमोर दोघे उपोषणास बसले होते. सर्वच ग्रामस्थांची समस्या असल्यामुळे गावातील अनेकांनी त्यांच्या उपोषणाला पाठिंबा दिला. ग्रामपंचायत प्रशासनाने उपोषणकर्त्यांची बाजू प्रशासनासमोर मांडून गावात जुना सिटी सर्वे लागू करावा अशी मागणी केली होती.
नगर भूमापन कार्यालयाचे उपअधीक्षक संजय धोंगडे, तहसीलदार गणेश शिंदे, गट विकास अधिकारी अनिल बागल यांनी ग्रामस्थ आणि उपोषणकर्त्यांची बाजू जाणून घेतली. गावातील सार्वजनिक समस्यांवर तोडगा काढण्यासाठी लवकरच पावले उचलली जातील असे आश्वासन दिले.
नगर व भूमापन कार्यालयाकडून वर्ष १९९३/९४ मधील गावातील मोजणी करून नकाशा व चौकशी नोंदवही तयार झाली आहे. त्या आधारे सनद मिळकत पत्रिका तयार करून गाव परीक्षणास घेतलेले दिसून येत नाही. हे काम तांत्रिक स्वरूपाचे असून, यासाठी वरिष्ठ कार्यालयाची परवानगी आवश्यक आहे. सहा महिन्यांपर्यंत परीक्षणाचे काम पूर्ण करून गावातील सर्वांना मिळकत पत्रिका व सनदा देण्यात येतील असे लेखी आश्वासन दिला आहे.