वडगाव निंबाळकर, ता. ४ ः समाजमाध्यमांवर फेक अकाउंट तयार करून शिक्षकाला लुटणाऱ्या दोन तरुणांना वडगाव निंबाळकर पोलिसांनी अटक केली आहे. अभिषेक विठ्ठलराव पांचाळ (वय २४, रा. उदगीर, लातूर) आणि सिद्धांत महादेव गगनयेडे (वय २५, रा. जळकोट, लातूर) अशी अटक केलेल्या आरोपींची नावे आहेत.
महिलेच्या नावाने फेसबुक- इन्स्टाग्रामवर फेक अकाउंट तयार करून शिक्षकाला फ्रेंड रिक्वेस्ट पाठवली. पुढे अश्लील चॅटिंग करून व्हायरल करण्याची धमकी देत त्यांनी १५ हजार, ३० हजार, ७० हजार, असे मिळून एकूण एक लाख १५ हजार रुपये खंडणी उकळली. आपली फसवणूक होत आहे लक्षात आल्यावर शिक्षकाने पोलिस ठाणे गाठले. आरोपींनी पुन्हा एक लाख रुपयांची मागणी केली. पैसे मी तुम्हाला प्रत्यक्ष देतो, असे सांगून आरोपींना वडगाव निंबाळकर पोलिस ठाणे हद्दीत बोलावून घेतले. यावेळी पोलिसांनी सापळा रचून दोन्ही आरोपींना ताब्यात घेतले.
गुन्ह्यात वापरलेले मोबाईल आणि मोटरसायकल पोलिसांनी जप्त केली आहे.
दोन्ही आरोपींना बारामती न्यायालयासमोर हजर केले असता पाच दिवसांची पोलिस कोठडी सुनावली आहे. दोन्ही आरोपी उच्चशिक्षित असून, शेअर बाजारामध्ये गुंतवलेले पैसे मिळाले नाहीत, कर्जबाजारी झाल्याने अशा पद्धतीने फसवणूक करून पैसे मिळवण्याचा प्रयत्न केल्याचे पोलिस तपासात निष्पन्न झाले आहे. या घटनेचा अधिक तपास सहाय्यक पोलिस निरीक्षक नागनाथ पाटील यांच्या मार्गदर्शनाखाली उपनिरीक्षक राहुल साबळे करत आहेत.