वडगाव निंबाळकर, ता. ८ ः निसर्गाचे मौन कधीकधी शब्दांपेक्षा जास्त बोलते आणि यावेळी ते वटवाघुळांच्या आकांतातून उमटले. निरा-बारामती मार्गावरील होळ (ता. बारामती) परिसरात वडाचे मोठे झाड पडल्यानंतर दुपारच्या उन्हात शेकडो वटवाघुळांनी आकाशात भरारी घेतली. नेहमी रात्रीच्या अंधारात उडणारे हे निशाचर दिवसा आर्त आकांत करताना पाहून उपस्थित नागरिक आणि निसर्गप्रेमी गहिवरले.
आमचं आश्रयस्थान कुठे? आता राहायचं कुठे? जणू अशीच वेदनादायी हाक या वटवाघुळांच्या उडण्यातून ऐकू येत होती. अनेक वर्ष या परिसरात वडांच्या दाट फांद्यावर त्यांनी आपले घरटे बांधले. त्यांच्या अनेक पिढ्या याच झाडांवर राहिल्या. उन्हापावसात सुरक्षित अशी त्यांची उंच निवासस्थाने झाडतोडीच्या कुऱ्हाडीखाली एका क्षणात कोसळली. रुंदीकरणाच्या कामात रस्त्याच्या दुतर्फा असलेली शेकडो वर्षांची जुनी झाडे एकामागून एक तोडली जात आहेत. यामुळे या झाडांवरील पक्षी, प्राणी बेघर झाले आहेत. परिसरातील निसर्गप्रेमी या दृश्याने हळहळ व्यक्त करीत आहेत. रस्ते रुंद होणे आवश्यक आहे पण निसर्गाचा समतोल बिघडून विकासाला अर्थ काय? असा प्रश्न निसर्गप्रेमी शशिकांत जेधे यांनी उपस्थित केला आहे. तसेच, झाडे तोडताना किमान या पक्षांसाठी पर्यायी निवारा उभारावा अशी मागणी त्यांनी केली आहे.