वेल्हे, ता. १६ : पानशेत (ता‌. राजगड) येथे आदिवासी कातकरी समाजाच्या युवकाचा दगडाने ठेचून निर्घून खून करण्यात आल्याची घटना रविवारी (ता. १५) रात्रीच्या सुमारास घडली. याप्रकरणी वेल्हे पोलिस ठाण्यात सोमवारी गुन्हा दाखल झाला आहे. रोहिदास काळुराम काटकर (वय २४, रा. कादवे, ता. राजगड), असे खून झालेल्या युवकाचे नाव आहे‌. घटनेनंतर मोटरसायकलवरून आलेले सर्व हल्लेखोर फरारी झाले. या प्रकरणी वेल्हे पोलिसांनी पाच अज्ञात हल्लेखोरांविरोधात खुनाचा गुन्हा दाखल केला आहे. खुनाचे कारण अद्याप स्पष्ट झाले नाही.
याबाबत वेल्हे पोलिसांनी माहिती दिली की, रविवारी रात्री आठ वाजण्याच्या सुमारास पानशेत येथे नंदाबाई कुंभार यांच्या हॉटेल समोर रोहिदास काळुराम काटकर व मोसे (ता. राजगड) येथील विजय पांडुरंग जाधव हे उभे होते‌‌ .त्यावेळी मोटरसायकलवरून आलेले वीस ते पंचवीस वयोगटातील पाच अज्ञात हल्लेखोरांनी त्यांना अचानक लाथाबुक्क्यांनी मारहाण केली. रोहिदास काटकर याच्यावर एकाच वेळी सर्व हल्लेखोरांनी लाथाबुक्क्यांनी जोरदार प्रहार केले. त्यावेळी एका हल्लेखोराने रस्त्यावर पडलेल्या मोठा दगडाने रोहिदास याच्या छातीवर जोरदार प्रहार केला. त्यात रोहिदास याचा जागीच मृत्यू झाला. या हल्ल्यात विजय जाधव हाही जखमी झाला. याप्रकरणी मृत व्यक्तीचा भाऊ अविदास काळूराम काटकर याने वेल्हे पोलिस ठाण्यात फिर्याद दिली आहे.
पानशेत बाजारपेठ, पानशेत वसाहत तसेच पुणे- पानशेत रस्त्यावरील सीसीटीव्ही कॅमेराच्या फुटेजच्या आधारे पानशेत पोलिस चौकीचे पोलिस अंमलदार आकाश पाटील, युवराज सोमवंशी, ज्ञानदीप धिवार आदी पोलिस जवानांसह वेल्हे व ग्रामीण पोलिस फरार हल्लेखोरांचा शोध घेत आहेत. अधिक तपास वेल्हे पोलिस ठाण्याचे सहायक पोलिस निरीक्षक नितीन खामगळ यांच्या देखरेखीखाली पोलिस उपनिरीक्षक अमित देशमुख करत आहेत.