वेल्हे, ता. २९ ः राजगड तालुक्यातील दुर्गम भागात कोसळणाऱ्या पावसामुळे विद्युत तारांवर झाडे पडल्याने या परिसरातील १० ते १२ गावांचा विद्युत पुरवठा खंडित झाला आहे. जवळपास २० ते २५ गावांमधील रुग्णांना प्राथमिक सेवांसाठी असलेल्या पासली (ता. राजगड)येथील प्राथमिक आरोग्य केंद्र तीन दिवसांपासून अंधारात असल्याचे समोर आले आहे. त्यामुळे रुग्णांसह कर्मचाऱ्यांचे मोठे हाल होत आहेत.
अठरागाव गाव मावळ दुर्गम भागात एकमेव आरोग्य सेवा देण्यासाठी पासली आरोग्य केंद्र आहे. या ठिकाणी सुमारे ३० ते ४० किलोमीटर अंतरावरून २० ते २५ गावातील रुग्ण औषध उपचार करण्यासाठी येतात. सद्यःस्थितीला जोरदार पडत असलेल्या पावसामुळे, तसेच शेतातील भात लावणीच्या कामांमुळे अनेक नागरिक, महिला, मुले आजारी पडत असून, सर्पदंशाच्या, विंचू चावल्याच्या घटना या परिसरामध्ये घडत आहेत. आरोग्य केंद्राच्या इमारतीसह कर्मचाऱ्यांच्या निवासस्थानांमध्ये काही दिवसांपूर्वी विषारी सापही आढळून आले आहेत.
या प्राथमिक केंद्रामध्ये सोलर पॅनलद्वारे विद्युत पुरवठा केला आहे. मात्र, खंडित विद्युत पुरवठ्यामुळे बॅटरीचा बॅकअप संपला आहे, तर अनेक दिवसांपासून सूर्यप्रकाशच नसल्याने यातून विद्युत पुरवठा होत नाही. त्यामुळे फ्रीजमध्ये ठेवल्या जाणाऱ्या आवश्यक त्या लसी या वेल्हे, करंजावणे येथील प्राथमिक आरोग्य केंद्रात ठेवल्या आहेत.

परिसरात कोसळणाऱ्या पावसामुळे व अपुऱ्या सूर्यप्रकाश अभावी सोलर पॅनेलचा बॅकअप संपला आहे. ऑक्सिजन कॉन्सन्ट्रेटर सुद्धा बंद झाल्याने रुग्णांची मोठी गैरसोय होऊ शकते. यासाठी ठिकाणी बॅटरी बॅकअपचा इन्व्हर्टर असणे गरजेचे आहे.
-डॉ. प्रकाश कुंभार, वैद्यकीय अधिकारी, पासली केंद्र

परिसरामध्ये वादळी वाऱ्यासह कोसळणाऱ्या पावसामुळे परिसरातील अनेक ठिकाणचा विद्युत पुरवठा खंडित होत असून, काही ठिकाणी विद्युत पुरवठा सिंगल फेजवर चालू आहे. वीजतंत्री कर्मचाऱ्यांच्या माध्यमातून युद्ध पातळीवर काम सुरू आहे.
- पुनम थोरवे, महावितरण कनिष्ठ अभियंता, वेल्हे शाखा २