वेल्हे, ता. ८ : विधानसभेच्या निवडणूकीच्या वेळी सरकारने शेतकऱ्यांना सरसकट कर्ज मुक्तीचे आश्वासन दिले होते पण जवळपास एक वर्ष उलटूनही याविषयावर कोणताही निर्णय सरकारने घेतलेला नाही. त्यामुळे शेतकरी आर्थिक संकटात सापडला आहे. राज्यातील शेतकऱ्यांना सरसकट कर्जमाफी करावी, अशी मागणी राजगड तालुका शिवसेना उद्धव बाळासाहेब ठाकरे गटाकडून करण्यात आली.
या संबंधिचे निवेदन राजगड तालुका तहसीलदार निवास ढाणे यांना बुधवारी (ता.८) देण्यात आले. या निवेदनात म्हटले आहे,''की राज्यातील शेतकरी सततच्या नैसर्गिक आपत्ती, दुष्काळ, अवकाळी पाऊस, गारपीट, उत्पादन खर्चातील वाढ महागडी खते, औषधे यामुळे आर्थिक संकटात सापडले आहेत. बहुतांश शेतकरी बँक व सावकाराकडील कर्जाच्या ओझ्याखाली दबले गेले आहेत. अनेकांना थकबाकीमुळे नोटिसा,जप्ती कार्यवाही,काहीकडून तर आत्महत्येचे टोकाचे निर्णय घेतले जात आहे. यावेळी शिवसेना तालुकाप्रमुख उमेश नलावडे, उपतालुकाप्रमुख बाळासाहेब पिलावरे, युवासेना प्रमुख शांताराम दारवटकर, उपजिल्हाधिकारी अनिल पारठे,विभाग प्रमुख गणेश उफाळे, शंकर मरगळे आदींसह शिवसैनिक तालुकाप्रमुख उपस्थित होते.