वेल्हे, ता. २ ः पाबे घाट रस्त्यावरील पाबे (ता. राजगड) गावच्या हद्दीत रविवारी (ता. २) दुपारी चार वाजण्याच्या सुमारास अचानक लागलेल्या भीषण आगीत मोटार जळून खाक झाली आहे. प्रसंगावधानता दाखवत गाडीचे चालक व इतर चौघे बाहेर पडल्याने त्यांचे प्राण वाचले.
याबाबत अधिक माहिती अशी की, नीलेश सुरेश देशपांडे व जितेंद्र विरकर यांच्यासह इतर तीघेजण कर्वेनगर पुणे येथून निसान कंपनीच्या टेरेनो मोटारीमधून (क्र. एमएच ०१ बीयू २३६४) वेल्ह्याकडे येत होते. पाबे घाट उतरल्यावर अचानक गाडीच्या इंजिनला आग लागली. रस्त्यातच पेट घेतलेल्या गाडीमुळे काही काळ वाहतूक खोळंबली होती. या घटनेची माहिती मिळताच वेल्हे पोलिस ठाण्याचे पोलिस उपनिरीक्षक अमित देशमुख, गोपनीय विभागाचे आकाश पाटील, आपत्ती व्यवस्थापन पथकाचे तानाजी भोसले व अग्निशमन दलाच्या जवानांनी घटनास्थळी येत पाण्याचा मारा करून आग आटोक्यात आणली. तसेच, रस्त्यामधील गाडी बाजूला करत वाहनांना रस्ता मोकळा करून दिला.

3329