वेल्हे, ता. ११ : कर्तव्यात कसूर व हलगर्जीपणा केल्याप्रकरणी वेल्हे बुद्रुक (ता. राजगड) ग्रुप ग्रामपंचायतीच्या तीन सदस्यांना महाराष्ट्र ग्रामपंचायत अधिनियम कलम ३९(१) प्रमाणे अपात्र करण्याचा निकाल पुण्याचे विभागीय आयुक्त डॉ. चंद्रकांत पुलकुंडवार यांनी मंगळवारी (ता. ९) दिला.
या प्रकरणी माजी सरपंच व विद्यमान सदस्य संदीप केशवराव नगीने, माजी उपसरपंच व विद्यमान सदस्य निखिल चंद्रकांत गायकवाड, तसेच माजी सरपंच व विद्यमान ग्रामपंचायत सदस्य मेघराज दत्तात्रेय सोनवणे यांच्यावर अपात्रतेची कारवाई करण्यात आली. याप्रकरणी वेल्हे ग्रामस्थ शंकरराव बबनराव चाळेकर, प्रमोद विठ्ठल भोरेकर, गणेश तानाजी निकम यांनी ६ नोव्हेंबर २०२३ रोजी तक्रार दाखल केली होती.
तक्रारदार चाळेकर, भोरेकर, निकम यांनी राजगडच्या गटविकास अधिकाऱ्यांकडे तक्रारी अर्ज दाखल केला होता. त्यांच्यामार्फत प्राथमिक चौकशी करून तत्कालीन सरपंच, उपसरपंच व विद्यमान सरपंच यांनी कामकाजामध्ये कर्तव्यात कसूर केल्याचा अहवाल मुख्य कार्यकारी अधिकारी याच्याकडे पाठवण्यात आला होता. या प्रकरणावर अंतिम अहवाल मुख्य कार्यकारी अधिकाऱ्यांनी दिला व विभागीय आयुक्त पुणे यांच्यासमोर सुनावणी ठेवण्यात आली होती.
या तक्रारीमध्ये १३ विविध मुद्द्यांवर चौकशी करण्यात आली होती. यामध्ये ग्रामपंचायत १५ वित्त आयोग निधी खर्च करताना बेकायदेशीर ठराव करून विठ्ठल रुक्मिणी देवस्थान ट्रस्टची पूर्व मान्यता न घेता आरो फिल्टर शेड बसवणे, चुकीचे मिळकत उतारे दाखवून वीज कनेक्शन घेणे, तसेच ग्रामपंचायतीकडून साहित्य वस्तू खरेदीची कार्यवाही करताना नियमांचे उल्लंघन करणे, वाहतूक लिलाव प्रक्रियेत त्रुटी, एकाच ठरावात सर्व खरेदी प्रक्रियेला मान्यता, ग्रामपंचायतीला आलेल्या नोंदीच्या अर्जावर आर्थिक फायद्याच्या हेतूने बेकायदेशीर शेरे मारणे व चौकशी लावणे, अशा विविध १३ मुद्द्यांवर तक्रारी केल्या होत्या. यामध्ये गटविकास अधिकाऱ्यांकडून प्रस्तुत प्रकरणी चौकशीचा अहवाल, जिल्हा परिषदेचे मुख्य कार्यकारी अधिकारी यांचा अंतरिम अहवाल यावरून विभागीय आयुक्त डॉ. पुलकुंडवार यांनी तीनही सदस्यांना अपात्रतेचे आदेश दिले आहेत.
याबाबत अपात्रतेची कारवाई केलेल्या माजी सरपंच व विद्यमान ग्रामपंचायत सदस्य संदीप नगीने यांच्याशी संपर्क साधला असता ते म्हणाले,
सदरच्या तक्रारी या राजकीय सूडबुद्धीने केल्या असून, या निकाल विरोधात ग्रामविकास मंत्र्यांकडे दाद मागणार आहे.