वेल्हे, ता. १४ : कादवे (ता. राजगड) परिसरातील डोंगरावर फिरत असताना रस्ता चुकून धोकादायक स्थितीत अडकलेल्या एकवीस वर्षीय परप्रांतीय युवकास सुखरूप बाहेर काढण्यास स्थानिक नागरिकांसह, पोलिस प्रशासनास यश आले आहे.
थरारक आणि जीव वाचवणारा बचावप्रसंग रविवारी (ता. १४) कादवे गावच्या हद्दीतील डोंगरावर घडला. दीपेश वर्मा (वय २१, रा. कुशीनगर, उत्तर प्रदेश) असे वाचविलेल्या युवकाचे नाव आहे.

हा तरुण शनिवारी (ता. १३) सायंकाळी कादवे येथील डोंगरावर फिरण्यासाठी गेला असताना रस्ता चुकला व अंधार झाल्याने, जंगल झाडीझुडपांमुळे आणि अवघड भूभागामुळे थेट कड्याच्या मध्यभागी अडकला होता. अख्खी रात्र तो कड्याच्या मध्यभागी अडकून राहिला. कोणताही पर्याय नसल्याने त्याने स्वतःला सावरत सकाळची वाट पाहिली.
रविवारी सकाळी सुमारे ११ वाजण्याच्या सुमारास त्या परिसरात असलेले स्थानिक नागरिक राहुल ठाकर यांना ‘बचाव… बचाव…’ असा आवाज ऐकू आला. स्थानिक राहुल ठाकर यांनी वेळ न दवडता तत्काळ वेल्हा पोलिस ठाण्याचे प्रभारी अधिकारी किशोर शेवते यांना घटनेची माहिती दिली. शेवते यांनी त्वरित कादवे गावाचे पोलिस पाटील भाऊसाहेब ढेबे यांना कळवून रेस्क्यू टीमला माहिती दिली.

माहिती मिळताच रेस्क्यू टीमचे उत्तम पिसाळ, अक्षय जागडे, वैभव जागडे, स्थानिक ठाकर, दत्ता जागडे, संजय चोरघे, वैभव भोसले व तानाजी भोसले व पोलिस पाटील यांनी तत्काळ घटनास्थळी धाव घेतली आणि कड्याच्या मध्यभागी अडकलेल्या दीपेश वर्मा यास सुखरूप बाहेर काढले.