वालचंदनगर, ता. २८ : भवानीनगर (ता. इंदापूर) येथील श्री छत्रपती सहकारी साखर कारखान्याने चालू वर्षीच्या गळीत हंगामामध्ये पहिल्या पंधरवड्यामध्ये गाळप झालेल्या उसाचा पहिला हप्ता एकरकमी ३ हजार रुपये प्रतिटनाप्रमाणे सभासदांच्या व गेटकेनधारकांच्या खात्यावर जमा केला असून, कारखान्याने दिलेल्या शब्द पाळला आहे, अशी माहिती कारखान्याचे अध्यक्ष प्रशांत काटे व उपाध्यक्ष अमोल पाटील यांनी दिली.
श्री छत्रपती सहकारी साखर कारखान्याच्या चालू वर्षीच्या गळीत हंगामास सुरुवात झाली आहे. कारखान्याने सोमवारअखेर (ता. २७) ७५ हजार टन ऊस गाळपाचा टप्पा पूर्ण केला. कारखान्याने सभासद व गेटकेनधारकांना उसाला प्रतिटन तीन हजार रुपये एकरकमी पहिला हप्ता देण्याचे जाहीर केले होते. पहिल्या पंधरवड्यामध्ये गाळप झालेल्या सर्व उसाचा पहिला हप्ता तीन हजार रुपयांप्रमाणे सभासदांच्या खात्यावर जमा केला आहे. तसेच, उसाच्या खरेदीपोटी ऊस उत्पादक सभासदांना व गेटकेनधारकांना दिल्या जाणाऱ्या उसाच्या पहिल्या हप्त्याबरोबरच बिगर अॅडव्हान्स ऊस तोडणी व वाहतूकदारांचे पहिल्या पंधरवड्याचे बिलदेखील मंगळवारी (ता. २८) जमा केले.
चालू वर्षीच्या गळीत हंगामामध्ये श्री छत्रपती कारखान्याने ९ लाख टन उसाचे गाळप करण्याचे उद्दिष्ट ठेवले आहे. या वर्षी सर्वच साखर कारखान्यांच्या कार्यक्षेत्रामध्ये उसाची उपलब्धता कमी असल्यामुळे उसाची पळवापळवी होण्याची शक्यता आहे. मात्र, आपल्या कारखान्याच्या सभासदांनी आपल्याच छत्रपती कारखान्याला ऊस देऊन सहकार्य करण्याचे आवाहन संचालक मंडळाने केले आहे.