वालचंदनगर, ता. २२ : इंदापूर तालुक्याच्या पश्‍चिम भागातील कळंब, बोरी, निमसाखर परीसरातील अवैध धंद्यांवर वालचंदनगर पोलिसांनी छापे टाकून चौघांवर गुन्हे दाखल केले आहेत.
वालचंदनगर पोलिसांनी दिलेल्या माहितीनुसार, कळंब गावातील जिल्हा बँकेच्या शाखेजवळील झाडाखाली सोमवारी (ता. २१) दुपारी साडेबाराच्या सुमारास बापू यशवंत चितारे हा उमेश घोडके (रा. कळंब) याच्या सांगण्यावरून कल्याण मटका नावाचा जुगार नागरिकांना खेळवत असल्याची माहिती मिळाल्यानंतर पोलिसांनी छापा टाकून कारवाई केली. यात चितारे याच्याकडून ७९० रुपये रोख व जुगाराचे साहित्य जप्त करून दोघांवर गुन्हा दाखल केला.
बोरी गावामध्ये दुपारी सव्वाचारच्या सुमारास सुजाता संतोष कुचेकर (वय ५५, रा. बोरी) ही महिला बेकायदेशीरपणे देशी दारू विक्री करत असल्याची माहिती मिळाल्यानंतर छापा टाकला. १०५० रुपयांच्या ३० बाटल्या जप्त करून गुन्हा दाखल केला.
निमसाखरमध्ये सायंकाळी सव्वापाचच्या सुमारास ताडी विक्रीच्या अड्ड्यावर छापा टाकून अनिल महेश भंडारी (वय ३३ रा. निमसाखर) याच्यावर कारवाई करण्यात आली. त्याच्याकडून १०५० रुपयांची ताडी जप्त करून गुन्हा दाखल केला. छाप्यात वालचंदनगर पोलिस ठाण्याचे सहायक पोलिस निरीक्षक राजकुमार डुणगे, हवालदार अभिजित कळसकर, महेश पवार, रामचंद्र आढाव, विजय मदने, प्रमोद टापसे यांनी सहभाग घेतला.