वालचंदनगर, ता. ११ : आनंदनगर (ता. इंदापूर) येथील श्रद्धा मंगेश शिंदे (वय २६) या गर्भवती महिलेने गळफास घेऊन आत्महत्या केल्याची घटना घडली. याप्रकरणी महेश प्रकाश शिंदे (वय ३६, रा. आनंदनगर) यांनी वालचंदनगर पोलिस ठाण्यात खबर दिली आहे. वालचंदनगर पोलिसांनी दिलेल्या माहितीनुसार, सोमवारी (ता. ९) दुपारी एकच्या सुमारास श्रद्धा शिंदे हिने घरासमोरील पत्र्याच्या शेडमध्ये गळफास घेऊन आत्महत्या केली. श्रद्धा ही गरोदर होती. श्रद्धा व पोटातील बाळाला वाचविण्यासाठी तातडीने लासुर्णेमधील खासगी दवाखान्यात व नंतर बारामतीतील, खासगी दवाखान्यात दाखल करण्यात आले. मात्र, उपचारपूर्वी तिचा आणि पोटातील बाळाचाही मृत्यू झाल्याचे पोलिसांनी सांगितले. याप्रकरणी पोलिसांनी अकस्मात मृत्यूची नोंद केली आहे. सहाय्यक पोलिस निरीक्षक राजकुमार डुणगे यांच्या मार्गदर्शनाखाली उपनिरीक्षक रतिलाल चौधर तपास करीत आहेत.