वालचंदनगर, ता. ११ : भवानीनगर (ता. इंदापूर) येथील श्री छत्रपती सहकारी साखर कारखान्याच्या पंचवार्षिक निवडणुकीसाठी आतापर्यंत ३३९ नागरिकांनी उमेदवारी अर्ज दाखल केले आहेत.
श्री छत्रपती सहकारी साखर कारखान्याच्या पंचवार्षिक निवडणुकीसाठी उपमुख्यमंत्री अजित पवार व साखर संघाचे माजी अध्यक्ष पृथ्वीराज जाचक यांच्यामध्ये युती झाली आहे. अजित पवार यांनी जाचक यांच्याकडे कारखान्याची जबाबदारी दिली आहे. छत्रपती कारखान्याचे संचालक होण्यासाठी इच्छुकांची गर्दी वाढत चालली आहे. उमेदवारी अर्ज दाखल करण्याची चढाओढ सुरु आहे. शुक्रवारी (ता. ११) एकाच दिवसामध्ये विक्रमी २२१ नागरिकांनी उमेदवारी अर्ज दाखल केले. आतापर्यंत ३३९ उमेदवारी अर्ज दाखल झाले आहेत. १५ एप्रिल रोजी उमेदवारी अर्ज दाखल करण्याचा शेवटचा दिवस आहे.