वालचंदनगर, ता. १५ : भवानीनगर (ता. इंदापूर) येथील श्री छत्रपती सहकारी साखर कारखान्याच्या पंचवार्षिक निवडणुकीसाठी ६०० नागरिकांनी उमेदवारी अर्ज दाखल केले आहे. यामध्ये काही विद्यमान संचालकांचाही समावेश आहे.
श्री छत्रपती सहकारी साखर कारखान्याची पंचवार्षिक निवडणूक २०१५ नंतर दहा वर्षांनी होत आहे. विद्यमान संचालक मंडळाला पाच वर्षांऐवजी दहा वर्षाचा कालावधी मिळाला. बारामती व इंदापूर तालुक्याच्या सीमेवरती असणाऱ्या छत्रपती कारखान्याचे संचालक होण्यासाठी अनेक सभासद इच्छुक आहे. उपमुख्यमंत्री अजित पवार व साखर संघाचे व छत्रपती कारखान्याचे माजी अध्यक्ष पृथ्वीराज जाचक यांच्यामध्ये युती झाल्यामुळे निवडणुकीचे वातावरण बदलले आहे. निवडणूक एकतर्फी होण्याची शक्यता असल्यामुळे पवार व जाचक यांच्या पॅनेलमधून उमेदवारी मिळावी, यासाठी अनेक इच्छुक आहेत.
मंगळवारी (ता. १५) उमेदवारी अर्ज दाखल करण्याचा शेवटचा दिवस होता. ६०० नागरिकांनी उमेदवारी अर्ज दाखल केले आहेत. अजित पवार यांनी जाहीर सभेमध्ये नव्या चेहऱ्यांना संधी देणार असल्याचे जाहीर केले असले, तरीही अनेक
विद्यमान संचालकांनी उमेदवारी अर्ज दाखल केले आहेत. पवार व जाचक यांच्या पॅनेलमध्ये कुणाची वर्णी लागणार, याकडे इंदापूर व बारामतीसह जिल्ह्याचे लक्ष लागले आहे.