वालचंदनगर, ता. २७ : भवानीनगर (ता. इंदापूर) येथील श्री छत्रपती सहकारी साखर कारखान्याच्या अध्यक्ष व उपाध्यक्षपदाच्या निवडी बुधवारी (ता. २८) होणार आहेत. उपमुख्यमंत्री अजित पवार यांनी अध्यक्षपदी पृथ्वीराज जाचक हे पाच वर्षे काम पाहणार असल्याचे जाहीर केले आहे. त्यामुळे त्यांची निवड होणार असल्याचे जवळपास निश्‍चित झाले आहे. तसेच, पाच वर्षामध्ये पाच गटातील पाच उपाध्यक्ष होणार असल्याचेही अजित पवार यांनी जाहीर सभेमध्ये सांगितले आहे. त्यामुळे पहिल्या उपाध्यक्षपदासाठी बारामती की इंदापूर तालुक्यातील कोणत्या गटामधील संचालकाची वर्णी लागणार, याकडे लक्ष लागले आहे.
श्री छत्रपती सहकारी साखर कारखान्याची पंचवार्षिक निवडणूक १८ मे रोजी पार पडली. १९ मे रोजी निवडणुकीचा निकाल जाहीर झाला. त्यामध्ये अजित पवार, क्रीडा मंत्री दत्तात्रेय भरणे व साखर संघाचे माजी अध्यक्ष पृथ्वीराज जाचक यांच्या श्री जय भवानीमाता पॅनेलचे सर्वच्या सर्व २१ उमेदवार विजयी झाले आहे. बुधवारी सकाळी अकरा वाजता कारखान्याच्या अध्यक्ष व उपाध्यक्षपदाच्या निवडीसाठी संचालक मंडळाच्या बैठकीचे आयोजन केले आहे. निवडणूक निर्णय अधिकारी म्हणून बारामतीचे प्रांताधिकारी वैभव नावडकर हे काम पाहणार आहेत.