वालचंदनगर : ‘‘निरोगी राहण्यासाठी व उत्साह वाढविण्यासाठी प्रत्येक नागरिकाने नियमित योगप्राणायम करण्याची गरज आहे’, असे मत क्रीडा व युवक कल्याणमंत्री दत्तात्रेय भरणे यांनी व्यक्त केले.
जंक्शन (ता.इंदापूर) येथे नंदिकेश्‍वर विद्यालय व ज्युनिअर कॉलेजमध्ये आयोजित केलेल्या आंतरराष्ट्रीय योग दिनाच्या कार्यक्रमामध्ये बोलत होते. यावेळी सदाशिव मोहोळकर शिक्षण संस्थेचे अध्यक्ष वसंत मोहोळकर, जिल्हा परिषदेचे माजी सदस्य प्रतापराव पाटील, श्री छत्रपती सहकारी साखर कारखान्याचे माजी उपाध्यक्ष अमोल पाटील, बाळासाहेब होळ, उद्धव माने, राहुल जाधव, सरपंच रोहित मोहोळकर, सुधाकर कणसे, विलास पवार, दत्तात्रेय साळुंखे, नंदिकेश्‍वर विद्यालयाचे मुख्याध्यापक चंद्रकांत सोळसे उपस्थित होते. यावेळी भरणे यांनी सांगितले की, राज्यातील खेळाडूंना जास्तीजास्त सुविधा देण्यासाठी प्रयत्न सुरु आहे.तसेच ग्रामीण भागातील खेळाडुंना प्रोत्साहन देऊन क्रीडा क्षेत्रामध्ये संधी उपलब्ध करून देणार असल्याचे सांगितले. यावेळी दत्तात्रेय भरणे यांनी योग-प्राणायाम करून विद्यार्थ्यांना प्रोत्साहन दिले.

05223