वालचंदनगर, ता. १८ : चोरीचे सोने विकत घेतल्याप्रकरणी वालचंदनगर पोलिसांनी भवानीनगर (ता. इंदापूर) येथील श्रीपाद ज्वेलर्सचे सराफ पंकज विलास शहाणे (वय ४८) याला अटक केली आहे. याप्रकरणी इंदापूर न्यायालयाने शहाणे याला शनिवार (ता. १९) पर्यंत पोलिस कोठडी दिली आहे.
पोलिसांनी दिलेल्या माहितीनुसार, ६ डिसेंबर २०२४ या दिवशी बेलवाडी (ता. इंदापूर) येथील सोनाली पप्पू सावंत यांच्या घरातून चौघाजणांनी एक लाख ७७ हजार रुपयांच्या सोन्याच्या दागिन्यांची चोरी केली होती. याप्रकरणी पोलिसांनी गेल्या महिन्यामध्ये मयूर ऊर्फ गांगल्या ऊर्फ संदेश भोसले (वय २१, रा. सोनगाव, ता. बारामती) याला अटक केली होती. तसेच गेल्या आठवड्यामध्ये समीर ऊर्फ बोतल करवंद काळे (वय ३६) याला अटक केल्यानंतर चोरट्यांनी चोरीचे सोने भवानीनगरमधील सराफ शहाणे याला विकल्याची माहिती दिली. त्यानंतर पोलिसांनी शहाणे याला अटक केली. याप्रकरणी अधिक तपास वालचंदनगर पोलिस ठाण्याचे सहायक पोलिस निरीक्षक राजकुमार डुणगे यांच्या मार्गदर्शनाखाली पोलिस उपनिरीक्षक रतिलाल चौधर करीत आहेत.