वालचंदनगर, ता.२६ : भवानीनगर (ता.इंदापूर) येथे श्री छत्रपती सहकारी साखर कारखान्याच्या वतीने बुधवारी (ता.२७) ऊस शेतीमध्ये कृत्रिम बुद्धिमत्ता (एआय) तंत्रज्ञानाचा वापराच्या माहितीसाठी भव्य शेतकरी मेळावा व कृषी प्रदर्शनाचे आयोजन केले आहे. कृषी प्रदर्शनामध्ये ६० पेक्षा अधिक स्टॉलची नोंदणी झाली आहे. शेतकऱ्यांनी कृषी प्रदर्शन पाहण्यासाठी उपस्थित राहण्याचे आवाहन कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांनी केले आहे.
कृषी प्रदर्शनामध्ये एआय तंत्रज्ञान ऊस शेतीसाठी फायदेशीर याची माहिती मिळणार असून, विशेष तज्ज्ञ शेतकऱ्यांना मार्गदर्शन करणार आहे. मेळाव्याला राज्याचे उपमुख्यमंत्री अजित पवार, कृषिमंत्री दत्तात्रेय भरणे, कृषी विकास प्रतिष्ठानचे अध्यक्ष, राजेंद्र पवार उपस्थित राहणार आहेत.