वालचंदनगर, ता.३० : शेती महामंडळातील कामगारांच्या प्रलंबित प्रश्‍नासाठी इंदापूर तालुक्यासह राज्यातील कामगार प्रतिनिधींनी महसूलमंत्री चंद्रशेखर बावनकुळे यांची भेट घेऊन कामगारांचे प्रश्‍न मार्गी लावण्याची मागणी केली.
शेती महामंडळातील कामगारांच्या प्रश्‍नांसाठी कामगारांनी १५ ऑगस्ट रोजी इंदापूर तालुक्यातील रत्नपुरी ते जंक्शनपर्यंत मोर्चा काढून सामाजिक कार्यकर्ते शेखर काटे, सागर मिसाळ व आकाश पवार यांनी उपोषण केले होते. कामगारांच्या प्रश्‍नासंदर्भात महसूलमंत्री बावनकुळे यांच्या समवेत मुंबईमधील मंत्रालयामध्ये नुकतीच बैठक झाली. यावेळी कृषिमंत्री दत्तात्रेय भरणे, महसूल राज्यमंत्री योगेश कदम उपस्थित होते. बैठकीमध्ये शेती महामंडळाच्या व्यवस्थापकीय संचालक यांना राज्यातील सात जिल्ह्यातील चौदा मळ्यावरील माहिती घेण्याची सूचना दिली. यामध्ये कामगार राहत असलेल्या खोल्यांची अवस्था, हंगामी कामगार, कायम कामगार, त्यांच्या कुटुंबाची सध्याची स्थितीचा अहवाल सादर करावा. कामगार कृती समितीने यापूर्वी नऊ मागण्या तत्कालीन महसूलमंत्री यांच्याकडे तडजोडीचा प्रस्ताव दिला. या प्रस्तावावर माहिती घेण्याचे आदेश ही देण्यात आला. अहवालानंतर शेती महामंडळ कामगार कृती समितीच्या पदाधिकाऱ्यांना व उपोषणकर्त्यांना बोलविण्यात येणार असल्याचे सामाजिक कार्यकर्ते सागर मिसाळ व शेखर काटे यांनी सांगितले. या बैठकीला शेती महामंडळ लढाकृती समितीचे प्रतिनिधी सुभाष कुलकर्णी, सागर मिसाळ, शेखर काटे, अतुल सावंत, अॅड. संजय चंदनशिवे, विणूनाथ भोईज, आकाश पवार, बाबासाहेब सावंत, भिकन शिंदे, सुभाष गुरव, भालचंद्र शिंदे, अमोल चव्हाण उपस्थित होते.