वालचंदनगर, ता. ३ : वालचंदनगर (ता. इंदापूर) येथे औद्योगिक नगरीमध्ये गुरुवारी (ता. ५) जैनाचार्य राष्ट्रसंत प.पू.१०८ आचार्य श्री गुणधरनंदीजी महाराज यांचे आगमन होणार असून विविध धार्मिक कार्यक्रम व सार्वजनिक प्रवचनाच्या कार्यक्रमाचे आयोजन केले आहे.
२५ वर्षाच्या प्रदीर्घ प्रतिक्षेनंतर गुणधरनंदीजी महाराज गुरुवारी वालचंदनगरमध्ये येणार आहेत. वालचंदनगर सन्मती मंडळ व जैन समाजाच्या वतीने त्यांचे भव्य स्वागत करण्यात येणार असून शोभायात्रेचे आयोजन केले आहे. वालचंदनगर परिसरातून भव्य शोभायात्रा काढण्यात येणार आहे. शुक्रवारी (ता. ६) मंगल कार्यालयामध्ये विविध धार्मिक कार्यक्रमांचे आयोजन केले असून पंचामृत अभिषेक होणार आहे. तसेच ‘एक व्हा...बंधुत्व जपा’ या विषयावर सार्वजनिक प्रवचनाचे आयोजन केले असून वालचंदनगर, कळंब, जंक्शन, लासुर्णे सह इंदापूर, बारामती व माळशिरस तालुक्यातील सर्व धर्मातील नागरिकांनी सहभागी होण्याचे आवाहन सन्मती मंडळ व जैन समाजाच्या वतीने केले आहे.