वाल्हे, ता. ९ : पुणे- पंढरपूर पालखी महामार्गाच्या विस्तारीकरणादरम्यान वाल्हे (ता. पुरंदर) येथील एसटी बसस्थानक शेड काढले आहे. अनेक दिवसांपासून येथे प्रवाशांना उभे व बसण्यासाठी सुसज्ज बसस्थानक व्हावे, अशी मागणी सातत्याने केली जात आहे. मात्र, प्रशासनाकडून अद्यापही दुर्लक्ष होत असल्याने सर्वसामान्य प्रवाशांना एसटी बसची वाट पाहताना रखरखत्या उन्हात चटके सोसावे लागत आहेत.
ऊन, वारा, पावसात ताटकळत बसची वाट पाहणाऱ्या आबालवृद्धांसह प्रवाशांच्या सुरक्षिततेसाठी प्रशासन डोळेझाक करत असल्याचे दिसून येत आहे. या मार्गावर बसथांबे नसल्याने रहिवाशांसह नवख्या प्रवाशांची दिशाभूल होत आहे. महामार्गाच्या विस्तारीकरणादरम्यान येथील मोडकळीस आलेले बसस्थानक जमीनदोस्त केले आहे. त्यामुळे नवीन ठिकाणी नव्याने बसस्थानक बांधण्यात यावे व प्रवाशांना सुविधा मिळावी, अशी मागणी जनसामान्यांतून अनेक वर्षांपासून होत आहे. मात्र, कोणतेच सोयरसुतक नसलेल्या प्रशासनाला याची झळ अद्याप पोहोचलीच नाही.
वाल्हे परिसराला पिंगोरी, हरणी, मांडकी, दौंडज, आडाचीवाडी, सुकलवाडी, वागदरवाडी आदी गावे वाहतुकीने जोडली गेली आहेत. येथून जेजुरी औद्योगिक वसाहतीसह पुणे, मुंबई, बारामती, सातारा आदी ठिकाणी नागरिक प्रवास करत आहेत. प्रशासन व लोकप्रतिनिधींच्या अनास्थेमुळे महामंडळाचा कारभार वाऱ्यावर आहे.

वाल्हे (ता. पुरंदर) : एसटी बसची वाट पाहताना प्रवासी.