वाल्हे, ता.१ : मागील चार दिवसांपासून पावसाने उघडीप दिल्याने शेतामध्ये वाफसा तयार झाला आहे. यामुळे वाल्हे परिसरात खरीप हंगामातील पेरणीपूर्व मशागतीसह इतर कामांना वेग आला आहे.
वाल्हे परिसरातील पिंगोरी, दौंडज, जेऊर, पिसुर्टी, राख परिसरात मुसळधार पाऊस पडला. मांडकी, गुळुंचे आदी भागामध्ये जोरदार पावसाची नोंद झाली आहे. मे महिन्यामध्ये दमदार पावसाने हजेरी लावल्याने पाणी टंचाईग्रस्त भागांना दिलासा मिळाला आहे. पावसामुळे मोठा आधार
मिळाला आहे. दरम्यान, चार दिवसांपासून पावसाने विश्रांती घेतल्याने शेतात वाफसा तयार झाल्याने खरीप हंगामातील पूर्व मशागत पिकांच्या चांगल्या वाढीसाठी आणि अधिक उत्पादनासाठी महत्त्वाची असल्याने मशागतीच्या कामासाठी शेतकऱ्यांची लगबग सुरू असल्याचे दिसून येत आहे.
जूनच्या सुरुवातीला सुरू होणारा खरीप हंगाम ऑक्टोबरच्या अखेरपर्यंत असतो. या हंगामातील पेरणी मे ते जुलै या काळात सुरू असते. खरीप हंगामातील पिकांची कापणी सप्टेंबर-ऑक्टोबरमध्ये सुरू होते आणि काही पिकांची काढणी नोव्हेंबर-डिसेंबरपर्यंत चालते.