वाल्हे, ता. ९ : जेऊर (ता. पुरंदर) परिसरामध्ये बुधवारी (ता. ९) पारंपरिक पद्धतीने आखाडी बेंदूर उत्साहात साजरा करण्यात आला. शेतकऱ्यांचा राजा म्हणजे बैल आणि या बैलाप्रती कृतज्ञता व्यक्त करण्याचा दिवस म्हणजे बेंदूर सण. सकाळपासूनच शेतकऱ्यांनी बैलांना धुवून रंगरंगोटी करून बैलांच्या गळ्यात पुष्पहार घालून सहकुटुंब पूजा केली. त्यानंतर वाजतगाजत बैलांची पारंपरिक मिरवणूक काढण्यात आली. बैलांसह घरोघरी मातीच्या प्रतिकात्मक बैलांचे पूजनही करण्यात आले. वर्षभर शेतात राबणाऱ्या बैलांचा वर्षातील एकमेव बेंदूर हा सण पुरंदरच्या अनेक भागांत साजरा करण्यात आला. लपतळवाडीसह मांडकी, जेऊर, पिसुर्टी, नीरा, गुळुंचे, कर्नलवाडी आदी नीरा नदीकाठच्या गावांमधून बेंदूर सण साजरा केला जातो. आधुनिक पद्धतीने सध्या शेतीची कामे ट्रॅक्टरद्वारे होत असल्यामुळे बैलांची संख्या कमी झाली आहे. त्यामुळे पूर्वी इतकी उलाढाल बाजारपेठांतून होत नाही.
बुधवारी (ता. ९) बेंदूर सणाच्या दिवशी तेल लावून गुळपाणी रंगीबेरंगी कलर लावून, अंगावर झूल चढवून शिंगाला बेगडी हिंगूळ, गळ्यात सण, म्होरकी, पायात चाळ बांधून बैलांना सजविण्यात आले होते. सायंकाळी पाचनंतर पारंपरिक ढोल-ताशाच्या तालावर बैलांची सवाद्य मिरवणूक काढण्यात आली. मिरवणुकीनंतर घरातील सुवासिनीच्या हातून बैलांची ओवाळणी करून पुरणपोळीचा घास भरवण्यात आला.