वाल्हे, ता. १८ : आळंदी-पंढरपूर पालखी महामार्गाच्या कामाने आता वेग घेतला आहे. याच कामाच्या अनुषंगाने वाल्हे (ता. पुरंदर) गावाला पाणीपुरवठा करणारी टाकी पाडली जाणार आहे. याचा गावाच्या पाणीपुरवठावर परिणाम होऊ नये यासाठी गावाच्या पूर्व दिशेला असणाऱ्या भवानीमाता डोंगरावरील वनविभागाच्या जागेत नवीन टाकी बांधण्यात येत आहे. मात्र, त्याचे काम संथगतीने सुरू आहे. सध्या वापरातील टाकी जीर्ण झाल्याने धोकादायक अवस्थेत आहे. टाकीच्या गळतीत वाढ झाली असून ती कोसळण्याच्या स्थितीत असून ती जमीनदोस्त करावी. तसेच नवीन टाकीचे काम लवकर पूर्ण करून पाणीपुरवठा सुरू करण्याची मागणी ग्रामस्थांनी केली आहे.
वाल्हे गावाला पाणीपुरवठा करणारी जुनी टाकी जमीनदोस्त केल्यास गावच्या पाणीपुरवठ्यावर परिणाम होणार होता. त्यासाठी वाल्हे ग्रामपंचायतीने पुणे जिल्हा बॅंकेचे अध्यक्ष प्रा. दिगंबर दुर्गाडे यांच्या नेतृत्वाखाली व उपमुख्यमंत्री अजित पवार यांच्या माध्यमातून भवानीमाता डोंगरावर वनविभागाकडील चौदा गुंठे जागा हस्तांतरित केली होती. ही वापरात असलेली टाकी जीर्ण झाल्यामुळे कोसळण्याचा धोका होता. टाकीच्या स्लॅबची तारा तुटलेली व बांधकाम जीर्ण झाल्याने सिमेंटचे तुकडे खाली निघत आहेत. कॉलमचे गजदेखील गंजून तुटले आहेत. याशिवाय, टाकीला लागलेल्या गळतीमुळे नागरिकांना पुरेसा पाणीपुरवठा होत नाही. ही जीर्ण टाकी पुणे-पंढरपूर पालखी महामार्गालगत असल्याने टाकीच्या बाजूने रस्ता असून त्यावर सतत वर्दळ असते. त्यामुळे नागरिकांच्या जिवाला धोका निर्माण झाला आहे. धोकादायक टाकी जमीनदोस्त करून ग्रामपंचायत प्रशासनाने नवीन उभारण्याची मागणी होत होती. आळंदी-पंढरपूर पालखी महामार्गाच्या विस्तारीकरणामध्ये जात आहे. त्यासाठी भवानीमाता डोंगरावरील नवीन टाकीचे काम सुरू केले होते. ते पूर्ण होत आले असून तांत्रिक बाबी पूर्ण झाल्यानंतर त्यातून पाणीपुरवठा सुरू होणार असल्याचे सरपंच अतुल गायकवाड यांनी सांगितले.