वाल्हे, ता. २२ : अनाथाचा नाथ दीनाचा दयाळ; भक्तांचा कृपाळ पांडुरंग, ये गा तूं विठ्ठला माझिया माहेरा; कृपेच्या सागरा पांडुरंगा अशा विविध अभंगांच्या गजरात वाल्हे(ता.पुरंदर) येथील आद्यरामायणकार महर्षी वाल्मिकीऋषी मंदिरामध्ये संत नामदेव महाराजांची पुण्यतिथी साजरी करण्यात आली. यानिमित्त महाप्रसाद व विविध धार्मिक कार्यक्रमांचे आयोजन करण्यात आले होते.
शिंपी समाज बांधवांच्या वतीने हा संत नामदेव महाराज पुण्यतिथी कार्यक्रम साजरा करण्यात आला. यावेळी उद्योजक मोहन पवार व माजी सरपंच अमोल खवले यांच्या हस्ते विधीवत पुजाअर्चा करून प्रतिमापुजन झाले. त्यानंतर टाळ-मृदूंगाच्या गजरात झालेल्या भजनांनी कार्यक्रमात रंगत आणली. याप्रसंगी ह,भ.प. बबनमहाराज भुजबळ, अनिलमहाराज पवार, माणिकमहाराज पवार, सुनिता पवार, अनुराधा काळंगे आदींसह ग्रामस्थ मोठ्या संख्येने उपस्थित होते. राजेंद्र काळंगे यांच्या वतीने महाप्रसादाचे वाटप करण्यात आले. दिलीप नाझरे, राजेंद्र ढवळे, हरि ढवळे यांनी कार्यक्रमाचे संयोजन केले.