वाल्हे, ता. २९ : नागपंचमी सणानिमित्त श्रावण मासाचा आनंद द्विगुणित करत वाल्हे (ता. पुरंदर) येथील रयत शिक्षण संस्थेच्या महर्षी वाल्मीकी विद्यालयात नुकतीच मेहंदी स्पर्धा झाली. विद्यार्थिनीमध्ये कलाप्रतिमा जोपासण्यासाठी आणि सणांबद्दल माहिती होण्याच्या उद्देशाने विद्यालयात प्रथमच ही स्पर्धा घेण्यात आली. यामध्ये पाचवी ते दहावीच्या विद्यार्थिनींनी उस्फूर्तपणे सहभाग घेत कलाकृती सादर केल्याचे प्राचार्य सतीश निगडे यांनी सांगितले.
शालेय अभ्यासक्रमाबरोबरच विद्यार्थ्यांमध्ये सण, उत्सवांतून सामाजिक व सांस्कृतिक जाण निर्माण व्हावी, यासाठी सांस्कृतिक आणि चित्रकला विभागाच्या वतीने मंगळवारी हा उपक्रम पार पडला. यात पाचवी ते १० वीपर्यंतच्या जवळपास १४० विद्यार्थिनींनी वैयक्तिकरीत्या सहभाग नोंदविला होता. आपल्या कल्पकतेच्या आणि कलात्मकतेच्या जोरावर विद्यार्थिनींनी एकाचढ एक अशा आकर्षक मेहंदी रचना सादर करत उपस्थितांची मने जिंकली. पर्यवेक्षिका नाझनीन अत्तार, सांस्कृतिक विभागाच्या शैला गवारी व चित्रकला विभागाचे संदीप जाधव यांनी स्पर्धेचे संयोजन केले.

स्पर्धेतील विजेत्यांची नावे
पाचवी ते सातवी : प्रथम- हुमेरा इनामदार , द्वितीय- आदिती भुजबळ, तृतीय- प्रांजल पवार, उत्तेजनार्थ- देवकी पवार
आठवी ते दहावी : प्रथम- आर्या पवार, द्वितीय- सानवी शिंदे, तृतीय- सई पवार, उत्तेजनार्थ - तमन्ना मुजावर
अकरावी बारावी : प्रथम- वैष्णवी सकलावे, द्वितीय- दीक्षा पवार, तृतीय- सोफिया तांबोळी