वाल्हे, ता. ३ : विवाह सोहळे वैभवशाली करण्यासाठी आजकाल लाखो रुपयांचा खर्च केला जातो, मात्र वाल्हे (ता. पुरंदर) येथील अभिजित राऊत व हर्षदा भुजबळ यांच्या विवाह सोहळ्यात पर्यावरण संवर्धनाचा अनोखा संदेश देत आयुर्वेद व फळझाडांची रोपे देऊन पाहुण्यांचे स्वागत करण्यात आले. या अभिनव उपक्रमामुळे हा सोहळा सर्वांचे लक्ष वेधत होता.
सध्याच्या काळातील लग्नांमध्ये वारेमाप खर्च केला जातो. कोणी हेलिकॉप्टरने, तर कोणी बुलेट वाहनावर लग्न मंडपात आल्याचे पाहायला मिळते, मात्र काही असेही सोहळे आई-वडिलांना आदर्शवत असे पार पडले जातात. रविवारी (ता. ३) अनिल राऊत यांचे चिरंजीव अभिजित राऊत व सुरेश भुजबळ यांची कन्या हर्षदा भुजबळ यांचा विवाह सोहळा जेजुरी (ता. पुरंदर) येथे पार पडला. यामध्ये पर्यावरण संवर्धनाचा अनोखा संदेश देत वर आणि वधूकडील दोन्ही कुटुंबीयांनी आपल्या लाडक्या मुलांच्या लग्नात आलेल्या वऱ्हाडी मंडळींना आयुर्वेदिक व फळझाडांची रोपे देऊन शेतकऱ्यांप्रती असलेली बांधिलकी जोपासली. लग्न समारंभप्रसंगी वर व वधु बोहल्यावर चढण्यापूर्वी या दोन्ही नवदांपत्याने स्वतः आपल्या हस्ते रोपांचे वितरण करून पर्यावरणप्रेमी भावनेची जाणीव व्यक्त केली. नवदांपत्याचा हा अनोखा उपक्रम लग्नमंडपात चर्चेचा विषय बनला होता. यामुळे मंडपात सकारात्मक चर्चा रंगल्याने पर्यावरण संवर्धनाचा संदेश देणारा हा विवाह सोहळा समाजापुढे आदर्श उदाहरण ठरला.
सोहळ्यास उपस्थित असलेले पुणे जिल्हा बँकेचे अध्यक्ष प्रा. दिगंबर दुर्गाडे, पुण्याचे इतर मागास व बहुजन कल्याण विभागेचे सहसंचालक संतोष हराळे, सरपंच अतुल गायकवाड, संदेश पवार, भाजपचे महाराष्ट्र प्रदेश ओबीसी मोर्चाचे उपाध्यक्ष सचिन लंबात, दीपक कुमठेकर, समदास राऊत आदींनी राऊत व भुजबळ कुटुंबीयांच्या पर्यावरणपूरक संकल्पनेचे कौतुक केले.