वाल्हे, ता. २३ : एकीकडे गोविंदा पथकांमध्ये विविध ठिकाणी लाखो रुपये किमतीच्या दहीहंडी फोडण्याच्या शर्यती सुरू असतानाच वाल्हे (ता. पुरंदर) येथील प्राथमिक शाळेतील चिमुकल्यांनी शैक्षणिक दहीहंडीचा चांगलाच आनंद घेतला. श्रीकृष्णाच्या वेशभूषेत अवतरलेल्या बाळगोपाळांनी गोविंदा रे गोपाळा...यशोदेच्या तान्हा बाळा म्हणत थरावर थर रचत दहीहंडी फोडून ज्ञानरूपी लोणी चाखले.
वाल्हे (ता. पुरंदर) येथील प्राथमिक शाळेत शनिवारी (ता. २३) दहीहंडी उत्सवाचा कार्यक्रम उत्साहात आणि जल्लोषात साजरा केला.
याला विद्यार्थी व पालकांचा उस्फूर्त प्रतिसाद लाभला. यामध्ये श्रीकृष्ण, राधा, गोपिका आणि गोपाळांच्या वेशातील बालगोपाल सहभागी झाले होते. कार्यक्रमाची सुरवात दहीहंडीच्या पूजनाने करण्यात आली. याप्रसंगी माधुरी भुजबळ, अमृता भुजबळ, रेश्मा इनामदार, मनिषा ढवळे, आशा किन्हाळे आदी पालक उपस्थित होते.
या दहीहंडीचे वैशिष्टे म्हणजे या दहीहंडी शेजारी दोरीवरती विविध प्रकारची शैक्षणिक पुस्तके, शैक्षणिक वाचनकार्ड लावून शैक्षणिक दहीहंडी बांधण्यात आली होती. सुरवातीला विद्यार्थ्यांनी थर लावत सलामी दिली. यावेळी विद्यार्थ्यांनी गाण्याच्या तालावर नृत्याद्वारे मनमुराद आनंद लुटला. यामध्ये इयत्ता पहिली ते चौथीचे विद्यार्थी सहभागी झाले होते. दहीहंडी उत्सवाच्या मुख्य आकर्षणाचा भाग म्हणजे चिमुकल्यांनी लावलेले तीन मनोऱ्याचे थर ठरले. विद्यार्थ्यांनी घेतलेल्या मेहनतीचे आणि साहसाचे सर्वांनी कौतुक केले.
या शैक्षणिक दहीहंडीसाठी अस्मिता भागवत, जयश्री पवार, कीर्ती लिपारे, मीनल खोडके, सपना पवार, राजेंद्र रोकडे आदींनी विशेष परिश्रम घेतले.