वाल्हे, ता. ३१ : वाल्हे (ता. पुरंदर) परिसरातील भुजबळ कामठवाडी येथील आंब्याचा मळा परिसरामध्ये गुरुवारी (ता. ३०) दुपारी शेतात कोमल सुशिल भुजबळ या महिला शेतकऱ्याला बिबट्याचे दर्शन झाले. त्यामुळे नागरिकांमध्ये नागरिकांमध्ये खळबळ उडाली होती.
कोमल या ऊसाच्या शेतामध्ये खुरपणी करत होत्या. त्यावेळी त्यांना अवघ्या २० ते ३० फुटांवर अचानक बिबट्या ऊसाच्या शेतातून बाहेर पडताना दिसला. पहिल्या क्षणात भितीने त्या थरथरल्या, पण शिताफी दाखवत त्यांनी शेतातून पळ काढला. नंतर त्यांनी परिसरातील नागरिकांना माहिती दिली. याबाबत वनविभागाला माहिती देण्यात आली असून, कर्मचाऱ्यांनी ताबडतोब परिसराची पाहणी केली. ग्रामपंचायत सदस्या मयुरी भुजबळ यांनी वनविभागाकडे त्वरित पिंजरा लावण्याची मागणी केली असून, या घटनेकडे गांभीर्याने पाहून तातडीने कारवाई न झाल्यास शेतकऱ्यांच्या जिवीतास धोका निर्माण होऊ शकतो, असे त्यांनी सांगितले. वनविभागानेही सतर्क राहण्याचे निर्देश दिले आहेत.