वाल्हे, ता. २२ : महाराष्ट्र राज्य परीक्षा परिषद आयोजित इयत्ता पाचवी (पूर्व उच्च प्राथमिक) व इयत्ता आठवी (पूर्व माध्यमिक) शिष्यवृत्ती परीक्षा रविवारी (ता. २२) नीरा (ता. पुरंदर) येथील केंद्रावर शिस्तबद्ध वातावरणात पार पडली. इयत्ता पाचवीसाठी येथील महात्मा गांधी विद्यालय व किलाचंद कनिष्ठ महाविद्यालय, तर इयत्ता आठवीची परीक्षा सौ. लीलावती रिखवलाल शहा कन्या विद्यामंदिरात पार पडली.महात्मा गांधी विद्यालय केंद्रावर नीरासह पिंपरे खुर्द व गुळुंचे परिसरातील १८१ विद्यार्थी परीक्षेस बसल्याची माहिती केंद्रसंचालक अनिल धुमाळ यांनी दिली. सौ. लीलावती रिखवलाल शहा कन्या विद्यामंदिर केंद्रावर नीरासह वाल्हे, पिंगोरी, गुळूंचे, जेजुरी, पिंपरे, व मांडकी येथील एकूण १८८ विद्यार्थ्यांनी परीक्षा दिल्याचे केंद्रसंचालक निर्मला माने यांनी सांगितले. भरारी पथकातील चिंतामण अद्वैत यांनी केंद्रांना भेट देऊन पाहणी केली व परीक्षा प्रक्रियेची माहिती घेतली.