वाल्हे, ता. १ : नीरा (ता. पुरंदर) येथील दगडेवस्ती येथे भरदिवसा गोठ्यातून ८० हजार रुपयांच्या चार शेळ्या आणि दोन बोकड चोरट्यांनी चोरून नेले. याप्रकरणी राहुल चंद्रकांत वाघमोडे यांनी नीरा पोलिस दूरक्षेत्रात तक्रार दिली असून, सीसीटीव्ही फुटेजमध्ये एक संशयास्पद स्विफ्ट मोटार दिसून आली आहे.
राहुल वाघमोडे चारा आणण्यासाठी घरी गेले असताना ही घटना घडली. चोरट्यांनी गोठ्यातील तीन गाभण शेळ्यांसह एकूण सहा जनावरे पळवून नेली. नीरा-मोरगाव मार्गावरील वर्दळीच्या ठिकाणी ही चोरी झाल्याने परिसरात खळबळ उडाली आहे. हॉटेलच्या सीसीटीव्हीमध्ये एक कार संशयास्पदरीत्या फिरताना दिसली असून, पोलिस त्या दिशेने तपास करत आहेत. वारंवार होणाऱ्या चोऱ्यांमुळे पोलिसांनी गस्त वाढवावी, अशी मागणी ग्रामस्थांनी केली आहे. पुढील तपास पोलिस हवालदार संतोष मदने करीत आहेत.