यवत, ता. १६ : गुरुवारी यवत (ता. दौंड) येथे संत तुकाराम महाराज पालखीचा मुक्कामी होता. आज सकाळी आठ वाजता पालखी वरवंड मुक्कामाला निघण्यापूर्वी पालखीची ग्राम प्रदक्षिणा झाली. ग्राम प्रदक्षिणेची ही अनेक वर्षांची परंपरा आहे. सकाळी आठ वाजता येथील ग्रामदैवत श्री काळभैरवनाथ मंदिरातून या ग्राम प्रदक्षिणेला सुरूवात झाली.
यवत येथील ग्रामस्थांनी पालखी खांद्यावर घेऊन ग्राम प्रदक्षिणेला सुरूवात केली. मुख्य बाजारापेठेतून पुढे मारुती मंदिर, म्हसोबा चौक अशी प्रदक्षिणा मारत शाळेच्या प्रांगणात या प्रदक्षिणेचा समारोप झाला. शाळेच्या प्रांगणात सार्वजनिक आरती करण्यात आली. त्यानंतर महामार्गालगत असलेल्या सेवा मार्गावरील रथात ही पालखी ठेवण्यात आली.
दरम्यान यवत येथील मुक्कामात कोणताही अनुचित प्रकार घडला नाही. पोलिस बंदोबस्ताचे चोख नियोजन केले होते. मुक्कामाच्या काळात निर्मल वारीमुळे स्वच्छतेला मोठा हातभार लागला. स्टेशनरस्ता, बाजार मैदान, पोलिस ठाण्या शेजारील मोकळी जागा अशा विविध ठिकाणी अस्थायी शौचालये मोठ्या उभारल्याने वारकऱ्यांना सुविधा मिळाली. त्यामुळे मागील काही वर्षांपासून वारी मुळे होणाऱ्या अस्वच्छतेची समस्या कमी होण्यास मदत झाली.
ग्राम प्रदक्षिणेच्या मार्गात विद्या विकास मंदिराच्या विद्यार्थिनींनी रांगोळीच्या पायघड्या घातल्या होत्या. मार्गात स्थानिक नागरिकांनी, महिलांनी दर्शनासाठी गर्दी केली होती. सकाळी साडेआठच्या सुमारास यवत ग्रामस्थांचा निरोप घेऊन पालखी सोहळा सकाळी साडे आठच्या सुमारास वरवंड मुक्कामाच्या दिशेने प्रस्थान झाले.