पुणे, ता. ४ ः पुण्यात सात दिवसांपूर्वी ८० रुग्ण एका दिवसात सापडले होते. मात्र, त्यानंतर अचानक रुग्णसंख्या वाढण्यास सुरवात झाली असून, मंगळवारी पुणे शहरात १ हजार १०४ जणांना कोरोनाची लागण झाली आहे. १९ मे २०२१ नंतर प्रथमच शहरात एका दिवसात एक हजारपेक्षा जास्त रुग्ण आढळले आहेत.
कोरोनाच्या दुसऱ्या लाटेमध्ये शहरात ८ एप्रिल रोजी एका दिवसात तब्बल ७ हजार १० जणांना कोरोनाची लागण झाली होती, त्यानंतर टप्प्याटप्प्याने शहरातील कोरोना रुग्णांची संख्या कमी होऊ लागली. ६ डिसेंबर २०२१ रोजी शहरात केवळ ३८ रुग्णांची नोंद झाली होती. मात्र, त्यानंतर एक महिन्याने हीच संख्या एक हजार १०४ पर्यंत वर गेली आहे. गेल्या आठवड्यात २७ डिसेंबर रोजी शहरातील ॲक्टिव्ह रुग्णांची संख्या ९९० इतकी होती, पण आता रुग्णसंख्या वाढत चालल्याने ४ जानेवारी रोजी २ हजार ८३८ सक्रिय रुग्णांची नोंद झाली आहे. कोरोनाची लागण होण्याचा दर हा तब्बल १८ टक्क्यांपर्यंत गेला आहे.