पुणे, ता. २२ ः साहित्यिक कलावंत प्रतिष्ठानतर्फे येत्या २५ व २६ डिसेंबर रोजी साहित्यिक कलावंत संमेलनाचे आयोजन करण्यात आले आहे. या संमेलनात वाग्यज्ञे साहित्य व कला गौरव पुरस्काराने अनुक्रमे डॉ. रावसाहेब कसबे आणि दिलीप प्रभावळकर यांना सन्मानित करण्यात येणार आहे, अशी माहिती प्रतिष्ठानचे अध्यक्ष आणि संमेलनाचे स्वागताध्यक्ष दिलीप बराटे यांनी बुधवारी पत्रकार परिषदेत दिली.

यंदा संमेलनाचे २१ वे वर्षे असून संमेलनाच्या अध्यक्षपदी लोकसाहित्याच्या ज्येष्ठ अभ्यासक आणि लेखिका डॉ. तारा भवाळकर यांची निवड करण्यात आली आहे. कोथरूड परिसरातील यशवंतराव चव्हाण नाट्यगृह येथे आयोजित या संमेलनाचे उद्घाटन २५ डिसेंबर रोजी सकाळी १०.३० वाजता महाराष्ट्र राज्य विश्वकोश निर्मिती मंडळाचे अध्यक्ष डॉ. राजा दीक्षित यांच्या हस्ते आणि राज्य महिला आयोगाच्या अध्यक्षा रूपाली चाकणकर आणि महापौर मुरलीधर मोहोळ यांच्या प्रमुख उपस्थितीत होणार आहे. याच दिवशी दुपारी चार वाजता ‘जागतिक युद्धखोरी आणि भारताची दिशा’ या विषयावर ‘सकाळ’चे संपादक संचालक श्रीराम पवार यांच्या अध्यक्षतेखाली होणाऱ्या परिसंवादात जतिन देसाई, संजय सोनवणी आणि डॉ. अमोल देवळेकर सहभागी होणार आहेत. तर २६ डिसेंबरला सायंकाळी सहा वाजता ज्येष्ठ साहित्यिक आणि शिक्षणतज्ज्ञ डॉ. न. म. जोशी यांच्या हस्ते ‘वाग्यज्ञे साहित्य व कला गौरव पुरस्कारा’चे वितरण होणार आहे, असे बराटे यांनी सांगितले. यावेळी साहित्यिक कलावंत प्रतिष्ठानचे सचिव वि. दा. पिंगळे, खजिनदार संजय भामरे आणि उपाध्यक्ष राजेंद्र वाघ आदी उपस्थित होते.