पुणे, ता. ३० : राष्ट्रवादी काँग्रेसच्या महाराष्ट्र प्रदेश चित्रपट व सांस्कृतिक विभागातर्फे शरद पवार यांच्या वाढदिवसानिमित्त आयोजित केलेल्या राज्यस्तरीय विनोदी नाट्य स्पर्धेचे पारितोषिक वितरण नुकतेच पार पडले. या स्पर्धेत कलाप्रेमी रंगमंदिर-पिंपरी चिंचवड यांनी प्रथम क्रमांक पटकाविला.

अभिनेते विजय पाटकर, राष्ट्रवादी सांस्कृतिक विभागाचे प्रदेशाध्यक्ष बाबासाहेब पाटील, अभिनेत्री प्रिया बेर्डे, लावणीसम्राज्ञी सुरेखा पुणेकर, दिग्दर्शक राजेश देशपांडे, अभिनेते गिरीश परदेशी, प्रदेश सचिव मंगेश मोरे आदी या वेळी उपस्थित होते. स्पर्धेमध्ये एस. के. एंटरटेनमेंट-सांगली यांनी द्वितीय क्रमांक, तर विजयश्री अकादमी-पुणे यांनी तृतीय क्रमांक पटकावला. उत्तेजनार्थ पारितोषिक सुरजन-मुंबई व समर्थ अकादमी-पुणे यांनी पटकावले. सर्वोत्कृष्ट अभिनेत्याचा मान सुरज भोसले व सागर चौगुले, तर सर्वोत्कृष्ट अभिनेत्रीचा मान माधुरी चौगुले, वनमाला बेंद्रे यांना मिळाला. अभिनयाचे उत्तेजनार्थ पारितोषिक अनुष्का पाटील, बाळासाहेब निकाळजे, सागर पवार, सविता इंगळे, संगीता टेकाळे, गणेश रणदिवे व कार्तिके ठाकरे यांना मिळाले. या स्पर्धेत सुमारे १०० संघांनी सहभाग घेतला होता.