पुणे, ता. १ : व्यसनाधिनतेच्या विळख्यात अडकत चालेल्या तरुणाईला निरोगी आरोग्याचा मार्ग दाखविण्याकरिता महाविद्यालयीन तरुणाईने पुढाकार घेतला. ‘दारू सोडा, दूध प्या’ असा संदेश देत तरुणाईसोबत शैक्षणिक संस्थेचे पदाधिकारी, पोलिस व सामाजिक कार्यकर्त्यांनी शुक्रवारी दूध वाटप केले. सिंहगड रस्त्यावरील वडगाव पुलाखालील चौकामध्ये जाधवर ग्रुप ऑफ इन्स्टिट्यूट, सिंहगड रोड पोलिस ठाणे आणि लायन्स क्लब ऑफ पुणे पर्ल यांच्या संयुक्त विद्यमाने ‘दारू सोडा, दूध प्या’ अभियान राबविण्यात आले. यावेळी नगरसेविका राजश्री नवले, नगरसेवक हरिदास चरवड, माजी नगरसेवक दिलीप नवले, सिंहगड रोड वाहतूक विभागाचे वरिष्ठ पोलिस निरीक्षक उदयसिंह शिंगाडे, सिंहगड पोलिस ठाण्याचे निरीक्षक घुले, संस्थेचे अध्यक्ष प्राचार्य डॉ. सुधाकर जाधवर, उपाध्यक्ष अ‍ॅड. शार्दूल जाधवर आदी उपस्थित होते.