पुणे, ता. २ : कोरोनाचा नवीन व्हेरिएंट असलेल्या ओमिक्रॉनचे राज्यात ५० रुग्ण आढळले आहेत. त्यापैकी ४६ रुग्ण पुण्यातील असल्याची माहिती राज्याच्या सार्वजनिक आरोग्य खात्याने रविवारी दिली. राज्यात आतापर्यंत ओमिक्रॉनचे ५१० रुग्ण आढळले असून, १९३ रुग्ण खडखडीत बरे झाले असल्याचेही खात्यातर्फे सांगण्यात आले.
राज्यात रविवारी ओमिक्रॉनचा संसर्ग असणारे ५० रुग्णांचे निदान झाले आहे. यापैकी ३८ रुग्णांचे निदान भारतीय विज्ञान शिक्षण आणि संशोधन संस्था (आयसर) येथे झाले. तर, १२ रुग्णांचे निदान राष्ट्रीय कोशिका विज्ञान केंद्र(एनसीसीएस) यांनी केले आहे. या ५० रुग्णांपैकी ३६ रुग्ण पुणे महापालिका क्षेत्रातील आहेत. आठ रुग्ण पिंपरी-चिंचवड महापालिकेतील रहिवासी असून, पुणे जिल्ह्यातील दोन रुग्णांचा यामध्ये समावेश आहे. उर्वरित चारपैकी दोन रुग्ण सांगली जिल्ह्यातील आणि ठाणे आणि मुंबई येथील प्रत्येकी एक रुग्ण असल्याचे आरोग्य खात्यातर्फे सांगण्यात आले.

दृष्टिक्षेपात राज्यातील ओमिक्रॉन रुग्ण
जिल्हा/मनपा आढळलेले रुग्ण
मुंबई .................३२८
पुणे मनपा ............४९
पिंपरी-चिंचवड .......३६
पुणे ग्रामीण ...........२३
ठाणे मनपा ............१३
नवी मुंबई, पनवेल ..... प्रत्येकी ८
कल्याण-डोंबिवली .................प्रत्येकी ७
नागपूर आणि सातारा .................प्रत्येकी ६
उस्मानाबाद ................५
वसई-विरार .................४
नांदेड .................३
औरंगाबाद, बुलडाणा, भिवंडी निजामपूर मनपा, मीरा भाईंदर, सांगली ................. प्रत्येकी२
नगर, अकोला, कोल्हापूर ................. प्रत्येकी १