पुणे, ता. २ ः करमाळा चॅरिटेबल ट्रस्टचे डॉ. चंद्रकांत शांताराम शहासने यांना पर्वती हरित क्रांती संस्थेच्या वतीने ‘पुण्यरत्न’ सन्मान प्रदान करण्यात आला आहे. ज्येष्ठ समाजसेवक गिरीश प्रभुणे यांच्या हस्ते डॉ. शहासने यांना मानपत्र देऊन गौरविण्यात आले. हा कार्यक्रम नुकताच पर्वती येथील भारतमाता अभ्यासिका येथे पार पडला.
या प्रसंगी संस्थेचे रवी कुलकर्णी, सचिव प्रमोद गोडबोले, सामाजिक वनीकरण विभागाचे उपवनसंरक्षक रंगनाथ नाईकडे आदी उपस्थित होते. डॉ. शहासने यांनी ‘गाथा भीमरावांची’मध्ये ३५०० अभंग लिहिले आहेत. तसेच वृक्ष लागवडीचा हरिपाठ, पर्यावरण स्त्रोत लिहिले आहेत. याबरोबरच गोमुत्रावर संशोधन केले असून, वृक्ष लागवड आणि संवर्धनाची जनजागृती केली. त्यांच्या या कामाची दखल घेत त्यांचा गौरव करण्यात आला. विजय सातपुते यांनी सूत्रसंचालन तर ॲड. अश्र्विनी कुलकर्णी यांनी आभार मानले.