पुणे, ता. २ : महापालिका प्रशासनाचा कारभार कसा सुरू आहे, याचे आणखी एक उदाहरण महात्मा फुले मंडई येथील मिसाळ वाहनतळावरून समोर आले. वेळे आधी वाहनतळ बंद करणे, वाहनचालकांकडून जादा शुल्क घेणे, त्यांना दमदाटी करणे, असे प्रकार या ठिकाणी सुरु असल्याचे पुन्हा एकदा निदर्शनास आले आहे. यामुळे बाजारात खरेदीसाठी येणाऱ्या नागरिकांची गैरसोय होत असल्याचे चित्र दिसून येत आहे.

महात्मा फुले मंडई, तुळशीबाग आणि परिसरात मोठी बाजार पेठ आहे. या ठिकाणी खरेदीसाठी येणाऱ्या नागरिकांच्या सोयीसाठी मंडई येथे महापालिकेकडून वाहनतळ उभारण्यात आले आहे. ते सध्या महापालिकेकडून चालविले जात आहे. परंतु महापालिकेचे नाव पुढे करून तेथील कर्मचारी ते वाहनतळ स्वत:च्या मालकीचे असल्याप्रमाणे वागत असल्याचे समोर आले आहे. याबाबत नागरिकांनी यापूर्वी अनेकदा महापालिकेकडे तक्रारी केल्या होत्या. त्यानंतर देखील प्रशासनाने या कर्मचाऱ्यांवर कारवाई केली नाही. त्यामुळे या कर्मचाऱ्यांना सध्या कुणाचाही धाक उरला नाही. त्याचा अनुभव अनेक अनेक वाहनचालकांना रविवारीही आला. नागरिकांना याबाबत ‘सकाळ’कडे संपर्क साधून तक्रारी केल्या. या कर्मचाऱ्यांबद्दल तक्रारीचे प्रमाण दिवसेंदिवस वाढत आहे. यासंदर्भात महापालिकेच्या अधिकाऱ्यांशी संपर्क साधला असता तो होऊ शकला नाही.

या आहेत वाहनचालकांच्या तक्रारी
-वाहनतळ वेळे आधीच बंद केले जाते
-अडकलेल्या वाहनचालकांनाकडून दोन ते तीनशे रूपये घेतल्यानंतरच गाडी सोडली जाते.
-पावती एका रक्कमेची आणि आकरली जाणारी रक्कम वेगळीच असते
-जाब विचारणाऱ्या वाहनाचालकांना अरेरावीची भाषा वापरली जाते.
-वारंवार तक्रार करूनही महापालिकेकडून दखल घेतली जात नाही