पुणे, ता. ३ ः रोटरी क्लब साऊथतर्फे देण्यात येणारा व्यावसायिक गुणवत्ता पुरस्कार (व्होकेशनल एक्सलन्स अवॉर्ड) माजी प्रशासकीय अधिकारी श्रीनिवास सोहनी यांना प्रदान करण्यात आला. हा पुरस्कार सकाळ माध्यम समूहाचे अध्यक्ष प्रतापराव पवार यांच्या हस्ते देण्यात आला. शाल श्रीफळ व मानपत्र असे पुरस्काराचे स्वरूप होते. तसेच काश्मीरमध्ये सेवा कार्य करणाऱ्या अधिक कदम यांना मानद सदस्यत्व प्रदान करण्यात आले. या वेळी माजी प्रांतपाल अरुण कुदळे, रोटरी क्लब साउथच अध्यक्ष अतुल अत्रे, सचिव कृष्णकिरण वेलणकर, राजेंद्र गोसावी, यांच्यासह रोटरी पदाधिकारी व सदस्य उपस्थित होते. पवार म्हणाले, ‘‘हल्लीच्या काळात काही हेतू ठेवून विशिष्ट जाती, समाज व्यक्ति यांची बदनामी केली जाते. त्यामुळे वाईट परिणाम होतात. कारण अनेकदा याची सत्यता तपासली जात नाही.’’ सत्काराला उत्तर देताना सोहनी यांनी अफगाणिस्तान, भारत, पाकिस्तान, बांगलादेश, श्रीलंका हे जरी राजकीयदृष्ट्या वेगळे असले तरी या संपूर्ण उपखंडाची संस्कृती, नीतिमूल्ये ही एकच असल्याचे सांगितले.