पुणे, ता. ३ : महाराष्ट्र परीक्षा परिषदेचे आयुक्त तुकाराम सुपेंचा चालक आणि शिक्षण विभागातील तांत्रिक सल्लागार अभिषेक सावरीकर यांच्यात शिक्षक पात्रता परीक्षा (टीईटी) संदर्भात झालेले मोबाईलमधील चॅटिंग पोलिसांच्या हाती लागले आहे. त्यात परिक्षेतील गैरव्यवहाराबाबत बोलणे झाल्याचे उघड झाले आहे. दरम्यान, गैरव्यवहार प्रकरणात अटकेत असलेल्या सुपेंचा चालक व लातूरमधून अटक केलेला एजंट यांच्या पोलिस कोठडीत सहा जानेवारीपर्यंत न्यायालयाने वाढ केली आहे.

सुनील खंडू घोलप (वय ४८) आणि मनोज शिवाजी डोंगरे (वय ४५, रा. लातूर) अशी पोलिस कोठडीत वाढ करण्यात आलेल्यांची नावे आहेत. या प्रकरणी पुणे सायबर पोलिस ठाण्यात गुन्हा दाखल आहे. पुणे सायबर पोलिसांनी या प्रकरणात सुपेंचा चालक सुनील घोलप व एजंट मनोज डोंगरे यांना अटक केली होती. त्यांच्या पोलिस कोठडीची मुदत आज संपत असल्याने त्यांना न्यायालयात हजर करण्यात आले होते. न्यायालयाने या दोघांची सहा जानेवारीपर्यंत पोलिस कोठडीची मुदत वाढविली आहे. दरम्यान, पोलिस तपासात चालक सुनील आणि तांत्रिक सल्लागार अभिषेक सावरीकर यांच्यात झालेले मोबाईल चॅटिंग सापडले आहे. त्यात परिक्षेतील गैरव्यवहाराबाबत बोलणी झाली असल्याचे पोलिसांकडून न्यायालयात सांगण्यात आले आहे. गुन्ह्याची व्याप्ती मोठी आहे. आरोपींच्या मोबाईलच्या विश्लेषणाचे काम सुरू असून त्यामध्ये येणाऱ्या माहितीच्या आधारे त्यांकडे तपास करायचा आहे. डोंगरे याने देशमुख याकडून पैसे स्वीकारल्याचे पोलिस तपासात समोर आले आहे. ती त्याने कशासाठी स्वीकारली यासह गुन्ह्याच्या अधिक तपासासाठी आरोपींच्या पोलिस कोठडीची मागणी सहायक सरकारी वकील विजयसिंह जाधव यांनी केली.